Qırım Tili Kursı

Leyhanıñ adı: Qırım Tili Kursı

Tanıtma: “Qırımda yaşamaq – qırımca laf etmek” künümizniñ tabiiy alı olıp qalmaqta. Qırım memleketiniñ tili – qırımcadır. Qırımda yaşağan er bir insan qırımca bol laf etmeli. Bu til künümizniñ eñ kerekli ve ögrenmege çoq imkânı olmağanı içün “Qırım tili kursı” meydanğa keldi. Qırımcanı eñ keyfiyetli ve zemaneviy surette ögrenip te bol-bol qullanmağa istegenler içün qurulğandır.
Bu kurslar bu maalgece tilimizni ögrenüvde qullanılmağan tamamı ile yañı usulğa esaslanmaqtadır. Derslerimizniñ baş maqsadı – qırımca laf etmege, öz fikir ve duyğularını ifade ete bilmekni ögretmektir. Bunıñnen bir sırada bu kurslar latin elifbesinde doğru yazmaq ve oqumaq, cümlelerni doğru tizmek ve sözlerni doğru telâffuz etmekni de ögretecektir. Onıñ içün dersler esnasında grammatikanen beraber dialoglar, çeşit-türlü ayatiy allarnı muzakere etüv usullarına da pek çoq emiyet berilgendır. Kurs içün ayrı dersliklernen beraber çalışma defterleri azırlandı. Er bir ders soñunda mevzunen bağlı luğat ve sözlerni qullanuv misalleri de ketirilgendir. Yardımcı menbaa olaraq audio CD'lerniñ qullanılması da qararlaştırılğandır. Til ögrencileriniñ laf etme tecribelerini arttırmaq maqsadı ile meraqlı ve canlı dialog mevzularını seçmege areket ettik ve qolaydan qıyınğa doğru sıraladıq. Tilimizniñ özgünlik ve baylığı daa da teren añlaşılması içün aman-aman er bir dersniñ soñunda atalar sözü ve aytımlardan bir qaç misal ketirilip, lâtife ya da qısqa bir metin yardımı ile ne şekilde qullanılğanı añlatılğandır.

Maqsat: Qırımcanı ögrenebilmek içün imkân yaratmaq

Muddet: 2009 seneden berli

Leyhanı teklif etken taraf: BQ

Mesuliyetli:: Murat Yunusov

Beklenilgen netice: Tilni ögrenmege istegenler işbu imkândan faydalanacaqları beklenile.

Kontakt: qtk@bizimqirim.org, +38 093 379 68 20